Gŵyl Rhuthun Festival

Mae'n 40 mlynedd ers i'r llais addfwyn dawelu am byth, a hynny'n boenus o gynnar, ac yntau'n 57 oed. I nodi'r achlysur mae Donald Lloyd - nai David Lloyd - a'r tenor Rhys Meirion wedi trefnu cyngherddau ledled Cymru i gofio'r canwr a swynodd genedlaethau yng Nghymru a thu hwnt.

Rhys Meirion yw un o brif denoriaid Cymru. Yn enedigol o Dremadog, mae nawr yn byw yn Rhuthun. Wedi gyrfa gynnar fel athro ac yn dilyn cyfnod yn astudio yn Ysgol Gerdd a Drama'r Guildhall yn Llundain, gwnaeth ei ymddangosiad proffesiynol cyntaf gydag Opera Cenedlaethol Lloegr yn 1999. Cymerodd rannau Rodolfo, Nemorino, Tamino, Y Dug a Pinkerton.

Bu'n rhan o Opera Gorllewin Awstralia, Cymdeithas Opera Hong Kong, Opera Australia, Opera Cenedlaethol Lithuania a'r BBC Proms, ac ymddangosodd yng ngwyliau cerdd Henley, Cheltenham, Gogledd Cymru ac Abertawe a chyngherddau ym Marbados, Toronto, Ottawa a Florida. Mae'n ymddangos yn gyson fel unawdydd gwadd mewn cyngherddau opera gyda'r Gerddorfa Philharmonic Brenhinol.

Mae ei recordiau yn cynnwys Benedictus, albwm o ddeuawdau gyda Bryn Terfel, a thair CD unigol ar label Sain. Y tymor diwethaf, cymerodd ran Fenton yn Falstaff i Opera Cenedlaethol Cymru a chyngherddau yn yr Ariannin ac mewn lleoliadau ar draws Prydain. Ymysg ei gynlluniau am y dyfodol mae Lorenzo yn Fra Diavolo gydag Opera Stanley Hall a chyfres o gyngherddau teyrnged i'r tenor Cymraeg enwog, David Lloyd.

Ganwyd Annette Bryn Parri yn Neiniolen, yng nghalon ardal y chwareli yn Arfon, a daeth i amlygrwydd yn ifanc fel pianydd, ac fel aelod o driawd Genod Ty'r Ysgol. Graddiodd yng Ngholeg Cerdd Manceinion, ac ymunodd ag Adran Gerdd Coleg Prifysgol Bangor fel tiwtor piano i fyfyrwyr BA a BMus.

Bu'n gyfeilydd i rai o enwau mwyaf y byd adloniant, gan gynnwys Bryn Terfel, Rebecca Evans ac Aled Jones, a pherfformiodd gerbron Syr Andrew Lloyd Webber, Syr Georg Solti ac aelodau o'r teulu brenhinol. Bu'n gweithio'n rheolaidd gyda Chwmni Opera Cenedlaethol Cymru yn ddiweddar, ac yn unawdydd mewn cyfres o gyngherddau Corau Meibion Unedig yng Ngogledd Orllewin Lloegr.

Ers 2002, Annette yw Cyfarwyddwr Cerdd Côr Meibion y Traeth. Mae'n un o sylfaenwyr-gyfarwyddwyr Canolfan Gerdd William Mathias, ac fel cynhyrchydd a chyfeilydd bu'n gyfrifol am dros 40 o gryno-ddisgiau, gan gynnwys Benedictus gan Bryn Terfel a Rhys Meirion, a enwebwyd ar gyfer Gwobr y Classical Brits yn 2006.

Côr Meibion Trelawnyd yw un o gorau meibion mwyaf Cymru gydag oddeutu 100 o aelodau. Mae'r Côr wedi ymddangos gydag unawdwyr nodedig fel Bryn Terfel, Rhys Meirion a Gwyn Hughes Jones ac wedi perfformio gyda bandiau enwog fel Glofa Grimethorpe a Black Dyke.

Cafwyd llwyddiant eisteddfodol hefyd gan ennill yn yr Eisteddfod Genedlaethol ar saith achlysur. Daeth y Côr yn ail allan o 50 o gorau yn 1981 yng nghystadleuaeth Côr y Flwyddyn BBC Radio Wales ac yn ail eto yn 2005 yng nghystadleuaeth BBC Cymru i Gorau Meibion. Ymhellach oddi cartref, cipiwyd y wobr gyntaf yng Ngwyl Ryngwladol Eire yn Cork.

Bu'r Côr yn perfformio yn y cyngerdd Mil o Leisiau yn Neuadd Albert yn ogystal ag mewn cyngherddau yn Ewrop a Gogledd America ac mae'n ymddangos yn aml ar y teledu. Mae'r rhaglen amrywiol yn ymestyn o Vivaldi i Andrew Lloyd Webber, o ganeuon gwerin i glasuron modern - nifer wedi eu trefnu gan yr Arweinydd, Geraint Roberts.